Čakča joavdá ja mánát fertejit vuolgit skuvlii. Beiboš lea Sire gussa, ja dan sii váldet mielde guoddit dávviriid ja vai mánáin lea mielki mielde. Áhčči láide Sire.

Eahkedis áhčči čujuha stuora ja suhkkes guosa, mii šaddá luoddaguoras: "Dán guosa vuolde mii oađđit boahtte ija. Mun lážán midjiide litna oađđensajiid."

Nie muittaša girječálli mánnávuođas vuosttas skuvlamátkkis internáhttii, gosa galggai čiežajahkásažžan.

Máŋggat jagit leat vássán ja Sire lea fas jođus Guhturii gili nuoraidjoavkkuin, vai beassá vuosehit sidjiide iežas duovdagiid. Áhččis lea ofelažžan. Sii galget meattildit guosa man vuolde Sire idjadii, muhto ii son dovdda šat guosas. Dat oainnat ii leat šat seammalágan suhkkes ja lodnjás guossa. Sire fuobmá, ahte ii su áhččige leat šat seamma bikžil, iige su áhči juolgige šat loktan seamma geahppadit go su mánnávuođas. Áigi lea čálligoahtán mearkkaidis, nu su áhči gorudii, go maiddái idjadanguosa hápmáige.

Bargojagiidis maŋŋá Siiri Magga-Miettunen čálligoahta vásáhusaidis muitalussan. Dán girjjis lea govviduvvon sápmelaš smávvádálolačča eallin maŋimus máilbmesuođi maŋŋá gitta 1970-logu radjai. Lohkki álkit buohtastuvva vásáhusaidis ja historjjás vuođul Sire girjji muitalusaide.