Nils-Aslak Valkeapää, Áillohačča, (1943-2001) teáhterčájálmas Ritnoaivi ja nieguid oaidni

Junichiro Okura čállá ovdasánis: «Sapporos, Hokkaidō sullos, lágiduvvojedje Árktalaš álbmogiid doalut 1995. Lágideaddjit diŋgojedje Áillohaččas čájálmasa, mas šattai Ritnoaivi ja nieguid oaidni. Sis lei dušše okta eaktu: das galgá leat luohti. Áilu válddii muinna oktavuođa ja jearai ráđi. Dihten jo dalle, ahte son liikui árbevirolaš japánalaš kultuvrii, erenoamážit nō-teáhterii. Dihten maid ahte nō-teáhtera vuoigŋa heivii Áillu vuohkái. . . . Moatte mánu geažes Ritnoaivi ja nieguid oaidni-čájálmasa giehtačálus lei gárvvis.
Čájálmasas nuorra boazovázzi snahpasta dollagáttis ja niegadiš­goahtá. Niegus soai dološ luohtečehpiin hálešteaba eallin­filosofiijas. Loahpas boahtá ovdan, ahte luohtemeašttir leage nuorra boazovázzi boaresolmmožin.
Áillu veršuvnna vuođđun leat divttat ja luođit, mii lea oarjemáilmmi teáhteráddejumi mielde poesikonsearta, muhto nō-teáhteris dat lea albma čájálmas.
Munnje lea stuorra gudni beassat muitalit Áillohačča čájálmasas Ritnoaivi ja nieguid oaidni, man son guđii testameantan roahkasmahttin dihtii Sámi ja oppa máilmmi nuoraid. Danin lea stuorra ášši, go dat almmustuvvá dál máŋggagielat girjin.»