Vuoli Ilmar (Ilmari Mattus) kovvee taan kirjeest jieijâs škovlâääigi 1950-lovvoost Kaamâs kansaškoovlâst. Tot kovvee tallaa ääigi já tábáhtusâid dokument tärkkivuođáin mut nuuvt, et tast lii šoddâm čaabâkirjálâšvuotâ - mielâkiddiivâš roomaan. Lohhee piäsá jotteeđ fáárust uccâ kandii kiäđgáás pálgá lääđi škovlamailmist. Miätá kirje tobdoo keeldâ kyevti maailm ja kulttuur kooskâst. Nubbe tain lii päikki, päikkikuávlu ja säämieellim, nubbe vist korrâ já omâs läädikulttuur, mon pargon oro lemin säämikulttuur avkkâdem. Vuâttoo kontrast: luholâs säämieellim ja luhottes škovlâ já läädimaailm. Pääihist sáttoo kal maiddei ahevis tábáhtus, mut tot lii liijká päikki, uápis saje, mast lii torvolâš čiärruđ. Mut čiärruđ lii karttâm meiddei škoovlâst. Sevŋis vuođâlohán puáhtá oovdân siämmást meiddei taggaar äigipaje, mast suáti lâi nuuhám ovdebáá vuođâlovveest.